PENGAWA BEPOLITIK

Begulai tauka pecah parti sigi adat bepolitik. Sapa kering iya ngulu, sapa lemi ngitih belakang; nadai beleman nya.

Enti nemu diri empu lemi, bebendar ka agi meh ngerempong bala penyokong – bala rayat.

Enti nadai duit, anang bepolitik; giga dulu pukok enggai ka nyau cengkeram.

Enti bisi pemandai tang enda nemu matak bala rayat, anang bepolitik; nuan tetap kalah.

Enti Dayak enggai beserakup tauka begerempong, dini-dini organisasi Dayak sigi bepecah.

Enti Dayak nadai polisi ngerempong, ngulu sereta ngemansangka bansa diri, bansa Dayak sigi enda berubah; “maintain status quo”.

Selagi Dayak agi senang di-rasuah enggau duit-ringgit, pangkat, projek, bisnis, penduduk sereta pingat, sigi agi senang bansa bukai merintah bansa Dayak.

Peda aku ka diatu ba PRS sereta dalam SPDP bansa Dayak sigi udah cukup kuat begulai…..tang diatu bansa Dayak sigi ka lalu rindu besabong enggau pangan-diri. Enda lantang ati enti enda ngelaban laban cara kompromi tu ukai adat Dayak kini?

Bisi Ketuai laban, nadai Ketuai ngelaban…

Bisi pangan bai berekak, nadai kaban ngerekak orang….

Bisi penemu enggai mantai, nadai penemu ngelesei ka orang….

Siti agi di-peda aku, bansa Dayak sigi ari suba rindu berebut ka nyadi Ketuai sereta berebut ka kuasa. Nadai pengunjong….

Bisi nya madah ka diri ka ngiring-ngulu ka bansa Dayak tang beserakup enggau bansa bukai “multi-racial”, bah ni gaya tu deh?

Bisi nya ka ngemai bansa Dayak begerempong dalam siti parti, tang ka peda kitai diatu nyau balat endar ga bala Dayak muka ‘kelang sabong’ ngelaban pagan-diri; bah bakani gaya nya deh?

Bisi nya besebut ka “shadow cabinet”, bah nama kabuah bansa Dayak enda ngaga “Dayak Shadow Cabinet” kadiri empu deh?

Bisi nya ngumbai bansa Melayu takut ka “Dayak Chief Minister”, bah nama kabuah bansa Dayak enda takut dipeggai bansa bukai deh? Kati enggau nya deh?

Nota:

“Shadow Cabinet” tu baka “Alternatif Kabinet” (non-formal/non-governmental – more like “Think-Tank Cabinet” or strategically structure like the real cabinet ministerial portfolios); mansih polisi, merati ka pengawa/pemansang, meri penemu, nyukat prestasi, ngaga analisi, sereta macam-macam agi.

Ingat:

Dalam pengawa bepolitik semoa orang/bansa ulih nyadi kaban – ulih nyadi penyokong – ulih nyadi penyakal – ulih nyadi bakeh pia mega ulih nyadi lawan – ulih nyadi munsoh.

Pengawa politik tu sigi skim ngerebut kuasa; sapa mayoh agi suara tauka penduduk iya meh meggai tampok perintah – meggai kuasa merintah menoa Sarawak.

Kitai Dayak maioh pandai, maioh macam pengawa, maioh macam suku, maioh macam runding, maioh macam penatai, maioh macam pengidup, maioh macam penemu, maioh utai temu, maioh macam ulah nya meh kabuah kitai enda sebaka.

Minta ampun laban tu sigi penemu aku siko aja. Terima Kasih

OUR DIFFERENCES MAKE US A DIFFERENT PEOPLE; HUMAN NATURE.